У Зэльвенскай раённай бібліятэцы для дзяцей праведзена гульня-падарожжа “Любімыя кнігі чытаючы, прафесіі мы выбіраем”. Першыя крокі да выбару будучай прафесіі дзіця робіць у раннім дзяцінстве. Менавіта тады дзеці прымяраюць на сябе ролі ўрачоў, повараў, прадаўцоў, вадзіцеляў – тых прафесій, якія яны бачаць вакол сябе. У гэтым ім актыўна дапамагаюць дзіцячыя кнігі. Многія рабяты мараць вырасці такімі ж добрымі, як доктар Айбаліт, або такімі ж адказнымі, як дзядзька Сцёпа.
На сустрэчы бібліятэкары пазнаёмілі юных чытачоў з новымі кнігамі па тэме: “Хто нам шые адзенне?”, “Хто нас лечыць?”, “Хто чыніць аўтамабіль?”, “Хто нам гатуе?”. А таксама ў гульнявой форме ўспомнілі прафесіі сваіх бацькоў. У ходзе мерапрыемства ўдзельнікі прадэманстравалі свае веды, праявілі дапытлівасць і актыўнасць. Дзеці, зацікавіўшыся кнігамі, зразумелі, што бібліятэка – выдатны спосаб даведацца пра розныя прафесіі. Яны паабяцалі прыходзіць сюды часцей, каб пашыраць свае веды.
