З 14 па 17 мая, да Міжнароднага Дня сям’і, у Каралінскай сельскай бібліятэцы дзейнічала фотавыстава “У аб’ектыве сям’я”. Гэтая кранальная экспазіцыя стала яркім адлюстраваннем цяпла, любові і ўзаемаразумення, якія пануюць у сем’ях аднавяскоўцаў. На фотаздымках, прадстаўленых на выставе, адлюстраваны самыя шчырыя і душэўныя моманты: ўсмешкі дзяцей, клапатлівыя погляды бацькоў, абдымкі бабуль і дзядуляў. Фотавыстава стала не проста наборам прыгожых фатаграфій, а сапраўдным святам сямейных каштоўнасцяў. Яна нагадала аб тым, як важна шанаваць і берагчы сваіх блізкіх, бо сям’я – гэта самае дарагое, што ў нас ёсць.
