21 лютага ў свеце адзначаецца Дзень роднай мовы – свята, якое нагадвае кожнаму з нас, што без роднай мовы немагчыма адчуваць сябе часткай свайго народу. У нашай краіне, якая існуе ва ўмовах двухмоўя, гэта асабліва важна.
20 лютага ў Елкаўскай сельскай бібліятэцы з вучнямі 3 і 4 класаў ДУ “Елкаўская сярэдняя школа” быў праведзены турнір знаўцаў роднай мовы “З любоўю да роднага слова”. Удзельнікі мерапрыемства актыўна спаборнічалі ў конкурсах, адгадвалі загадкі, падбіралі словы, якімі можна ахарактарызаваць, апісаць нашу мову. Хлапчукі і дзяўчынкі з задавальненнем паўдзельнічалі ў флэш-батле “Скорагаворкі”. На прыканцы мерапрыемства дзеці сабралі вялікі букет кветак для роднай мовы.
