Другога сакавіка работнікі Крывіцкай сельскай бібліятэкі-клуба запрасілі жыхароў аграгарадка Крывічы на фальклорную замалёўку “Масла на стале, Масленіца на дварэ”. Пад вясёлую народную музыку вядучыя запрашалі ўсіх на гулянне вольнае, Масленіцу раздольную, Масленіцу сустракаць, Зімачку праводзіць, а Вясну-красну да двара зазываць! Вядучыя віншавалі ўсіх прысутных са святам, прапаноўвалі весяліцца, спяваць, гуляць і гарэзнічаць. Праводзіліся гульні: “Навіны”, “Пеўневыя баі”, “Перацягванне каната”, “Эстафета з блінамі”, гульня на ўвагу “Ручаёк”. Частавалі гасцей свята блінамі, расказвалі пра тое, як адзначаюць кожны дзень Масленіцы, што сімвалізуюць бліны. Каб год быў багатым і шчаслівым, трэба чучала спаліць! Ад назапашанай за зіму горычы ды злосці пазбавіцца! Вядучая прапанавала ўсім прысутным напісаць на паперках усё дрэннае, ад чаго хацелася б пазбавіцца, папрасіць прабачэння адзін у аднаго.А затым усіх запрасілі прайсці да вогнішча, каб полымя распаліць, спаліць у агні ўвесь негатыў і праводзіць зіму вясёлым яркім карагодам!
