З самага ранняга дзяцінства мы чуем казкі. Іх нам чытае мама, калі ўкладвае спаць, распавядае бабуля ціхімі вечарамі. Слухаючы і чытаючы казку, мы трапляем у чароўны свет, дзе адбываюцца цуды, дзе дабро заўсёды перамагае зло. Менавіта ў чароўны свет казкі акунуліся маленькія чытачы Зэльвенскай раённай бібліятэкі падчас віктарыны «Казка мудрасцю багатая«. Падчас мерапрыемства ўдзельнікі даведаліся аб розных жанрах казак, паўдзельнічалі ў займальных конкурсах на веданне казачных герояў. Весела і з вялікім азартам яны адказвалі на пытанні, дэманструючы казачную эрудыцыю. Яшчэ цікавей стала, калі гучалі загадкі-выказванні казачных герояў. Дзеці не толькі пазналі персанажаў, але і назвалі казку, у якой яны жывуць. Рабяты паспяхова справіліся з віктарынай і атрымалі зарад бадзёрасці і добрага настрою.
