З дзяцінства нам вядомыя казкі Андэрсана, яны вучаць міласэрнасці і любові. Героі казак Андэрсана любімыя і малымі, і дарослымі. У Елкаўскай сельскай бібліятэцы для дзяцей аздараўленчага прышкольнага лагера “Вясёлка” быў арганізаваны літаратурны турнір “Сузор’е казак Андэрсана”. Спачатку мерапрыемства бібліятэкар пазнаёміла дзяцей з біяграфіяй і цікавымі фактамі з жыцця казачніка. Затым усе разам адправіліся ў дзіўную краіну, дзе жывуць яркія і непаўторныя героі Ганса Хрысціяна Андэрсана. Дзеці праявілі сябе сапраўднымі знаўцамі твораў аўтара: называлі казку па малюнку, адгадвалі казачных персанажаў па апісанні, збіралі пазлы па казках «Дзюймовачка», «Снежная каралева», «Русалачка», адказвалі на пытанні віктарыны, адгадвалі загадкі. Увазе ўдзельнікаў была прадстаўлена кніжная выстава “У свеце казак дацкага чараўніка”. Дзеці з вялікай цікавасцю разглядалі маляўнічыя выданні і кожнаму захацелася ўзяць дадому кнігу для чытання.
