У Зэльвенскай раённай бібліятэцы прайшоў майстар-клас па культуры абыходжання з кнігай і дробным рамонце старых бібліятэчных кніг “Жыві, кніга!”. Паспрабаваць сябе ў ролі кніжнага доктара прыйшлі дзеці гімназіі №1. З аповеду бібліятэкара прысутныя даведаліся пра тое, што з часам бібліятэчныя кнігі прыходзяць у непрыгоднасць па прычыне іх старэння, нядбайнага абыходжання чытачоў з кнігамі. І такіх кніг у фондзе бібліятэкі, на жаль, не мала. Але кнігам можна падоўжыць жыццё, калі выконваць правілы карыстання кнігай, а таксама своечасова іх рамантаваць. Успомнілі правілы беражлівага абыходжання з кнігай, а пераплётчык раённай бібліятэкі Струг Святлана Тадэвушаўна падзялілася сакрэтам, як можна “вярнуць да жыцця” кнігі. Дзеці вельмі старанна і акуратна падклейвалі старонкі, прыводзілі ў парадак вокладкі кніг, распраўлялі загнутыя старонкі, выціралі гумкай алоўкавыя паметкі. Займаючыся рамонтам кніг, дзеці захапіліся новай, па-сапраўднаму карыснай справай, ўключыліся ў працу з жаданнем і цікавасцю. У ходзе работы адчулі важнасць сваёй працы, самастойна прыйшлі да высновы: кнігі трэба берагчы! Адрамантаваныя кнігі атрымалі “другое дыханне”, а самі дзеці — новыя веды і яркія ўражанні аб свеце кніг.
